ABB Invest: IPO investorlarının 60%-dən çoxu 35-40 yaşadək şəxslər olub

IPO dövründə səhm sifarişi verən investorların 60%-dən çoxunu 35-40 yaşadək şəxslər təşkil edib.

Şirkət nümayəndəsinin sözlərinə görə, ən aktiv investor qrupu məhz 35-40 yaş aralığında formalaşıb.

“IPO dövründə yaş qrupları üzrə analiz aparmışdıq və sifariş verənlərin 60%-dən çoxu 35-40 yaşa qədər olan əhali idi,” şirkət nümayəndəsi deyib.

ABB Invest qeyd edib ki, təkrar bazar üzrə yaş statistikası hələ tam təhlil edilməyib, lakin daha gənc istifadəçilərin investisiya bölməsinə marağının yüksək olduğu müşahidə olunur.

Şirkət bunu mobil tətbiqlərdən istifadənin rahatlığı ilə əlaqələndirib. Məlumata görə, mobil tətbiqdə ən çox ziyarət olunan bölmələrdən biri investisiya səhifələridir.

“İnsanlar mütəmadi olaraq portfellərinə, səhmlərin qiymət dinamikasına baxır və ticarət edirlər. Bu, bizim üçün müsbət göstəricidir,” nümayəndə bildirib.

ABB Invest əlavə edib ki, ABB-nin mobil tətbiqini iki milyondan çox istifadəçi yükləyib, aktiv istifadəçilərin sayı isə 1.5 milyona yaxındır.

Şirkət əsas məqsədinin mobil tətbiq istifadəçilərini investisiya xidmətlərinə daha çox yönləndirmək olduğunu qeyd edib.

N.Təbrizli