Bu gün onların günüdür. Minayə ilə birlikdə bu günü dünyada bir milyarddan çox insan qeyd edir. Azərbaycanda isə sağlamlıq imkanları məhdud olan 530 mindən artıq şəxs var. Beynəlxalq Əlillər Günü ilə əlaqədar Əmək və Əhalinin Sosial Müdafiəsi Nazirliyi (ƏƏSMN) tərəfindən əlillərin stolüstü idman oyunları üzrə IV ümumrespublika yarışlarının qaliblərinin mükafatlandırılması mərasimi keçirilib. Nazir Səlim Müslümov əlilliyi olan şəxslərə dövlət qayğısının artırılmasının ölkəmizin sosial dövlət statusunun səciyyəvi cəhətlərindən olduğunu bildirib: "Onlar cəmiyyətin bir parçası olaraq qəbul edilməlidir. Onlara qarşı heç bir diskriminasiya hallarına yol verilə bilməz. Bu insanlar üçün bərabər imkanlar yaradılmalıdır və onlar cəmiyyətin tam üzvü kimi çıxış etməlidirlər. Hesab edirəm ki, Azərbaycan qoyulan bu konvensiyaları yerinə yetirir. Söhbət kiminsə kimə yazığı gəlməsindən yox, hər bir insanı özü ilə bərabər hiss etməsindən gedir".

Əlilliyi olan şəxslərin yaradıcılıq və idman qabiliyyətlərinin dəstəklənməsi sahəsində görülən işlərdən bəhs edən Səlim Müslümov bildirib ki, Gənclər və İdman Nazirliyi ilə əməkdaşlıq şəraitində əlillərin stolüstü idman oyunları üzrə IV ümumrespublika yarışlarının təşkili də bu işlərin davamıdır. Nərd, dama, şahmat, stolüstü tennis və qol güləşi (armrestlinq) idman növləri üzrə zona yarışlarında min nəfərə yaxın şəxs arasında fərqlənən 103 nəfər, o cümlədən 95 nəfər əlil şəxs və 8 nəfər sağlamlıq imkanları məhdud uşaq final mərhələsində iştirak edib. Daha sonra yarışlarda I, II və III yerləri tutmuş şəxslərə mükafatlar, ümumən  yarışların final turunda iştirak edənlərin hər birinə pul mükafatları və təşəkkürnamələr təqdim olunub. Səlim Müslümov qol güləşçiləri ilə birlikdə yarışa da qatılıb.