Fransanın Azərbaycandakı səfiri: Azərbaycan yolu açmağa borcludur

 

"Azərbaycan hakimiyyəti yaxın gələcəkdə Laçın dəhlizi boyunca təhlükəsizliyə və hərəkət azadlığına təminat vermək və böhranın daha da dərinləşməsinin qarşısını almaq öhdəliyi daşıyır və buna borcludur”, -  səfir öz tvitterində yazıb. 

 

Millət vəkili Hikmət Babaoğlu hesab edir ki, səfirin bu açıqlaması Azərbaycanın daxili işinə qarışmaq cəhdidir. 

 

"Azərbaycan dəfələrlə bəyan edib ki, Qarabağda yaşayan ermənilərin təhlükəsizliyini özü təmin edəcək. Onların hər cür humanitar ehtiyaclarını da qarşılamağa hazırdır. Belə olan halda hansısa ölkənin digər ölkənin daxili işlərinə qarışması yolverilməzdir. Fransanın Azərbaycandakı səfiri Azərbaycanda oturaraq ölkəmizin daxili işlərinə qarışmağa cəhd göstərir. Azərbaycanın heç bir öhdəliyi yoxdur. Yeganə öhdəlik dövlətin konistutiyasını əlçatan etməkdir. Hazırda aparılan sülh danışıqları ərəfəsində Brüsseldə keçirilən son görüşdə humanitar yardımın Xankəndi-Ağdam yolu ilə çatdırılması razılaşdırılıb. Bu yol daha əlverişli hesab edilir. Beynəlxalq Qızıl Xaç Komitəsi də bununla bağlı öz mövqeyini bildirib", - Babaoğlu açıqlamasında vurğulayıb.

 

Deputat bildirir ki, Azərbaycan heç bir halda Laçın dəhlizini açıb yüklərin çatdırılmasına şərait yaratmayacaq. Çünki bu yüklər Azərbaycanla razılaşdırılmadan göndərilib və Azərbaycan da buna yol verməyəcək. 

 

İyulun 26-da Ermənistan Azərbaycanla razılaşdırmadan 400 tonluq humanitar yardımı Qarabağda yaşayan erməni vətəndaşlara çatdırmağa cəhd edib. Azərbaycan tərəfi öncədən bəyan edib ki, həmin yüklərin keçirilməsinə icazə verilməyəcək, çünki bu barədə Azərbaycana məlumat verilməyib. 

 

Ölkə başçısının köməkçisi Hikmət Hacıyev də açıqlama verərək deyib ki,  "Təkcə Laçın yolundan istifadə etməkdə israrlı olmaq, amma Ağdam yolundan imtina etmək, yolu bağlamaq, siyasiləşdirmək yolverilməzdir.

 

 

Gülnar Nazimqızı