Azərbaycan Türkiyə-İsrail gərginliyinin azaldılması üçün səy göstərir - Prezident

Azərbaycan Türkiyə və İsrail arasında mövcud gərginliyin azaldılması istiqamətində səssiz şəkildə səylər göstərir. Bu barədə Prezident İlham Əliyev bildirib.

O, hər iki ölkəni strateji tərəfdaş və etibarlı dost adlandırıb.

“Azərbaycan və İsrail arasında ittifaq de-fakto formal əməkdaşlıqdan çox əvvəl mövcud idi. İsrail Azərbaycan üçün dost ölkədir və bu dostluq illər ərzində çətin anlarda dəfələrlə sınaqdan keçib. Məhz buna görə də Türkiyə ilə İsrail arasında indiki gərginlik bizi ciddi şəkildə narahat edir,” –  Əliyev bildirib.

Prezident qeyd edib ki, əvvəlki böhran dövründə də Azərbaycan iki ölkə arasında dialoqun bərpasında mühüm, lakin ictimaiyyətə açıq olmayan rol oynayıb.

“Hətta deyə bilərəm ki, həmin normallaşma prosesində əsas təşəbbüskar Azərbaycan idi. Biz bunu nə şöhrət, nə də tanınmaq üçün etməmişdik – yalnız yaxın müttəfiqlərimizə kömək məqsədi güdürdük,” –  o vurğulayıb.

Həmin səylərin nəticəsi kimi İsrail Prezidenti İsaak Hersoqun Türkiyəyə səfəri və Prezident Rəcəb Tayyib Ərdoğanla görüşü, eləcə də Ərdoğanın Nyu-Yorkda Baş nazir Benyamin Netanyahu ilə görüşü baş tutub. 

Əliyev bildirib ki, hazırda bölgə eyni gərginliyin yenidən qayıtdığına şahidlik edir. “Bu, bir növ déjà vu kimidir. Amma biz diplomatik mexanizmi bilirik və sizi əmin edirəm ki, Azərbaycan bu dəfə də səhnə arxasında fəal şəkildə çalışır,” –  o qeyd edib.

Prezident vurğulayıb ki, vasitəçilik səyləri hazırda gizli saxlanmalıdır və hər iki ölkənin suverenliyinə hörmət edilməlidir.

“Səssiz diplomatiya, etimad və xoş niyyət üzərində qurulub. Biz inanırıq ki, bu gərginlik həll oluna bilər və dialoq üstünlük qazanacaq,” – Əliyev bildirib.

O əlavə edib ki, dost ölkələr arasında münaqişə təkcə onların özünü deyil, həm də tərəfdaşlarını və bütövlükdə regionu təsir altına alır. Mövcud etimadsızlığa baxmayaraq, Azərbaycan konstruktiv əməkdaşlıq üçün hələ də imkanların olduğuna inanır.

“Biz normallaşma prosesinin davam etməsini dəstəkləyirik və Azərbaycan bu məqsədə çatmaq üçün əlimizdən gələni edəcək,” –  o əlavə edib.

N.Təbrizli