Tramp Azərbaycanla əməkdaşlıq etməyə hazır olduğunu bildirib

ABŞ Azərbaycanla tərəfdaşlığı və ölkənin regional enerji sabitliyinə verdiyi töhfəni yüksək qiymətləndirir və Bakı ilə əməkdaşlığın davam etdirilməsinə ümid edir. Bu fikirləri ABŞ prezidenti Donald Tramp Bakı Enerji Həftəsinin iştirakçılarına ünvanladığı müraciətdə bildirib.

Müraciəti ABŞ Dövlət Departamentinin baş müşaviri Vayatt Telke səsləndirib. Mətn Azərbaycan prezidentinin rəsmi saytında dərc olunub.

Tramp vurğulayıb ki, son 30 ildə Azərbaycan regionun enerji sektorunda liderlik nümayiş etdirib və qlobal enerji təhlükəsizliyinə sadiqliyini göstərib.

“Ölkələrimiz karbohidrogen sahəsində son dərəcə məhsuldar tərəfdaşlıq qurub. Təbii qazın qarşıdakı onilliklərdə artan dünya enerji tələbatının ödənilməsində mühüm rol oynayacağı barədə ortaq fikirdəyik. Hər bir ölkənin öz resurslarından firavanlığı üçün istifadə etmək hüququnu dəstəkləyirik. ABŞ Azərbaycanla tərəfdaşlığı və bu tərəfdaşlığı mümkün edən regional enerji sabitliyini yüksək qiymətləndirir. Mən bu vacib sahədə əməkdaşlığımızın davamını səbirsizliklə gözləyirəm. Birgə səylərimizlə daha böyük enerji müstəqilliyinə, dayanıqlı inkişaf və iqtisadi artıma nail ola bilərik,” — ABŞ prezidenti qeyd edib.

Öz növbəsində, Telke Vaşinqton və Bakının onilliklərdir enerji sektorunda möhkəm tərəfdaşlıq münasibətləri saxladığını bildirib.

“Keçən il 'Əsrin müqaviləsi'nin imzalanmasının 30 illiyini qeyd etdik. Bu müqavilə ikitərəfli enerji əlaqələrimizin möhkəm təməlini qoydu. 'Əsrin müqaviləsi'ndən Cənub Qaz Dəhlizinə qədər Azərbaycan liderlik və uzaqgörənlik nümayiş etdirərək regionda və ondan kənarda enerji təhlükəsizliyinin əsas dayağına çevrildi. Biz Azərbaycanın enerji bolluğu potensialının reallaşdırılması və gələcək enerji təhlükəsizliyimizin təmin edilməsi istiqamətində əməkdaşlığımızın davamını gözləyirik,” — Dövlət Departamentinin rəsmisi əlavə edib.

N.Təbrizli