Azərbaycanla Ermənistan arasında müharibə artıq başa çatıb, biz dialoq mərhələsindəyik - Hacıyev

Azərbaycanla Ermənistan arasında müharibə başa çatıb və regionda yeni, hüquqa əsaslanan status-kvo formalaşıb. Bu barədə o, Slovakiyanın Hospodárske noviny qəzetinə müsahibəsində danışıb. Azərbaycan Prezidentinin xarici siyasət məsələləri üzrə köməkçisi Hikmət Hacıyev bildirib.

“İlk növbədə qeyd etmək istərdim ki, Azərbaycanla Ermənistan arasında artıq sülh var. Müharibə bitib. Sərhədlərimizə baxanda hər yerdə sakitlik və sabitlik görürsünüz. Deyərdim ki, bölgədə yeni bir status-kvo yaranıb — bu da hüquq və legitimlik üzərində qurulub. Təəssüf ki, əvvəlki status-kvo Ermənistanın Azərbaycan torpaqlarını hərbi yolla işğal etməsinə əsaslanırdı. Lakin biz artıq bu mərhələni arxada qoymuşuq və gələcəyə baxırıq,” — Hacıyev bildirib.

Onun sözlərinə görə, tərəflər artıq sülh sazişinin mətni üzrə razılığa gəliblər.

 “Yalnız son addım qalır. Biz gözləyirik ki, Ermənistan Konstitusiyasındakı Azərbaycana qarşı ərazi iddiaları ilə bağlı maddələr dəyişdirilsin”, - Hacıyev deyib.

O əlavə edib ki, tərəflər arasında birbaşa və vasitəçisiz dialoq mövcuddur.

“Biz Ermənistanla açıq danışırıq. Gündəliyimizdə olduqca mühüm məsələlər var. Ən önəmlisi isə budur ki, hərbi qarşıdurma elementləri artıq tamamilə gündəlikdən çıxarılıb.”

O bildirib ki, müəyyən fikir ayrılıqları qalır.

 “Amma qonşu ölkələr arasında fikir ayrılıqları bəzən tamamilə normaldır. Avropa İttifaqına üzv bəzi ölkələr arasında da belə hallar olur. Əsas məsələ budur ki, bu fikir ayrılıqlarını diplomatiya və dialoq yolu ilə həll edirik. Biz münasibətləri hərbi qarşıdurmadan müzakirəyə keçirə bildik. Bu, çox müsbət siqnaldır”, - o bildirib.

N.Təbrizli