Azərbaycan və Türkiyə prezidentləri Tiencin şəhərində görüşüb

Çinin Tiencin şəhərində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan görüşü keçirib.

Görüşdə iki ölkə arasında strateji müttəfiqlik və qardaşlıq əlaqələrinin enerji və nəqliyyat sahələrində genişlənməsindən məmnunluq ifadə olunub.

Xüsusilə, SOCAR ilə Türkiyənin “Botaş” şirkəti arasında əməkdaşlıq, Azərbaycan qazının Qətərin maliyyə dəstəyi ilə Türkiyə üzərindən Suriyaya nəqli və digər birgə enerji layihələri müzakirə edilib.

Qars-İğdır-Dilucu dəmir yolu xəttinin təməlqoyma mərasiminin və Azərbaycanda, o cümlədən Naxçıvan regionunda həyata keçirilən dəmir yolu layihələrinin əhəmiyyəti vurğulanıb.

Görüşdə həmçinin Azərbaycan və Ermənistan arasında normallaşma prosesi və Türkiyənin regional sabitlikdə rolu müzakirə olunub.

Türk Dövlətləri Təşkilatının bu il Azərbaycanda keçiriləcək Zirvə görüşünün əhəmiyyəti də diqqətə çatdırılıb.

Prezidentlər, iki ölkə arasında strateji müttəfiqlik və qarşılıqlı maraq doğuran digər məsələlər üzrə fikir mübadiləsi aparıblar.

Gülnar