Azərbaycanla Kolumbiya arasında mina problemi ilə bağlı əməkdaşlıq məsələsi müzakirə olunub

Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev ölkədə səfərdə olan Kolumbiyanın xarici işlər nazirinin müavini Xuana Kastro Santamaria ilə görüş keçirib.

Hacıyev bu barədə “X” sosial şəbəkəsində paylaşım edib və görüşü səmərəli qiymətləndirib.

Onun sözlərinə görə, tərəflər siyasi dialoqun hazırkı səviyyəsini müsbət qiymətləndirib və əməkdaşlığın genişləndirilməsi üçün geniş imkanların mövcudluğunu qeyd ediblər.

Hacıyev iqtisadi-ticari əlaqələr, mədəni və humanitar sahələr, həmçinin turizm və insanlararası mübadilə istiqamətlərində əməkdaşlığın inkişafı potensialının olduğunu bildirib.

O, həm Azərbaycan, həm də Kolumbiyanın mina problemi ilə üzləşdiyini qeyd edərək, bu sahədə təcrübə mübadiləsi və əməkdaşlıq imkanlarının müzakirə olunduğunu vurğulayıb.

Prezidentin köməkçisi, həmçinin Kolumbiya tərəfinin Azərbaycanda ispan dilinin təşviqinə verdiyi dəstəyə görə təşəkkürünü ifadə edib.