Paşinyan ümid edir ki, 2 il sonra Azərbaycana gələcək

Ermənistanın Baş naziri Nikol Paşinyan 2028-ci ildə Avropa Siyasi Birliyinin Zirvə Toplantısı çərçivəsində Azərbaycana səfər edə biləcəyinə ümid etdiyini açıqlayıb.

Paşinyan bu barədə mayın 4-də Avropa Siyasi Birliyinin 8-ci Zirvə Toplantısının plenar iclasında çıxışı zamanı danışıb.

O qeyd edib ki, Azərbaycan Prezidenti ilk dəfə Ermənistanda keçirilən tədbirdə iştirak edir, baxmayaraq ki, bu iştirak distant formatda baş tutur.

Baş nazir əlavə edib ki, Ermənistan və Azərbaycan Avropa Siyasi Birliyinin gələcək zirvə görüşlərinə ev sahibliyi etmək üçün bir-birinin namizədliyini qarşılıqlı şəkildə dəstəkləyiblər. Onun sözlərinə görə, bu, iki ölkə arasında münasibətlərin normallaşmasına yönəlmiş addımların göstəricisidir.

Paşinyan həmçinin xatırladıb ki, Türkiyə Prezidenti ilə ilk görüşü Praqada, Avropa Siyasi Birliyinin ilk sammiti çərçivəsində baş tutub.
O bildirib ki, hazırda Türkiyənin vitse-prezidenti İrəvanda keçirilən sammitdə iştirak edir və bu, Türkiyədən Ermənistana səfər edən ilk vitse-prezidentdir

Gülnar Nazimqızı