İlham Əliyev Trampa məktub göndərdi

Azərbaycan Prezidenti İlham Əliyev ABŞ Prezidenti Donald Trampa məktubunda ötən il Vaşinqtonda keçirilmiş Azərbaycan-Ermənistan sammitindən sonra iki ölkə arasında münasibətlərin normallaşdırılması istiqamətində irəliləyiş əldə olunduğunu bildirib.
Əliyev 8 avqust 2025-ci ildə ABŞ-ın ev sahibliyi etdiyi Vaşinqton sammitinin birinci ildönümü münasibətilə Trampa ünvanladığı məktubda görüşü Cənubi Qafqazda sülh prosesində dönüş nöqtəsi adlandırıb.

O bildirib ki, ötən il ərzində Azərbaycan və Ermənistan arasında münasibətlərin inkişafı istiqamətində bir sıra addımlar atılıb.

“Azərbaycan ərazisindən Ermənistana yük daşımalarına qoyulmuş məhdudiyyətlər aradan qaldırıldı, Azərbaycanın neft məhsulları, üçüncü ölkələrdən isə taxıl və digər məhsullar ölkəmizin ərazisindən keçməklə Ermənistana ixrac olunmağa başladı”, - Əliyev bildirib.

Prezidentin sözlərinə görə, Bakı sülhün iqtisadi və ticari faydalarını möhkəmləndirmək və iki ölkə arasında qarşılıqlı etimadı artırmaq üçün səylərini davam etdirəcək.

Əliyev məktubunda 2025-ci il Vaşinqton görüşü zamanı imzalanmış üçtərəfli Birgə Bəyannaməni, Azərbaycan və Ermənistan arasında sülh sazişinin paraflanmasını və ATƏT-in Minsk qrupunun ləğvinə dair birgə müraciəti regional sabitliyin təmin olunması baxımından mühüm addımlar kimi qiymətləndirib.

O, həmçinin TRIPP layihəsinin Cənubi Qafqazda nəqliyyat bağlantılarının və çoxtərəfli iqtisadi əməkdaşlığın inkişafı üçün əhəmiyyətini vurğulayıb.