İran naziri hicabsız qadınların təqib olunmayacağını bildirib
23.01.2025 20:22
İran hökuməti ictimai yerlərdə saçlarını örtməyən qadınlara təzyiq göstərməmək qərarına gəlib. Bu barədə İranın strateji məsələlər üzrə vitse-prezidenti Məhəmməd Cavad Zərif bildirib.
O, bunu "düzgün istiqamətdə atılan addım" adlandırıb. Bu barədə Mehr agentliyi xəbər verir.
Zərif bu açıqlamanı çərşənbə günü Davosda keçirilən Dünya İqtisadi Forumu çərçivəsində CNN-in jurnalisti Fərid Zəkəriyyə ilə söhbətində verib.
"Əgər siz Tehranın küçələrinə çıxarsınızsa, görərsiniz ki, bir çox qadınlar saçlarını örtmür. Bu, qanunsuzdur, lakin hökumət qadınlara təzyiq göstərməmək qərarına gəlib", – o bildirib.
İranın vitse-prezidentinin sözlərinə görə, bu qərar ölkə prezidenti Məsud Pəzeşkianın seçki kampaniyası zamanı verdiyi vədin yerinə yetirilməsi çərçivəsində qəbul edilib.
Zərif əlavə edib ki, ölkə prezidenti ictimai yerlərdə saçlarını örtməyən qadınlara cəza tətbiq edən qanunun icra olunmaması qərarını qəbul edib.
Onun sözlərinə görə, bu addım İran rəhbərliyinin – parlament sədri, məhkəmə sisteminin rəhbəri və Milli Təhlükəsizlik Şurasının razılığı ilə atılıb.
Bununla belə, Zərif vurğulayıb ki, qadınlara təzyiq göstərməmək üçün görülən tədbirlər hələ kifayət deyil, lakin bu, "düzgün istiqamətdə atılmış addımdır".
N.Təbrizli
www.anews.az
Foto 
Video 
