Ermənistanda yeni həbslər – müxalifət liderləri saxlanılıb

Ermənistanda Sotsk kəndinin rəhbəri Sevak Xaçatryan və Vardenis şəhər Şurasında “Vahid Vardenis” müxalifət fraksiyasının rəhbəri David Şahnazaryan saxlanılıb. Bu barədə “Müqəddəs Mübarizə” hərəkatı ilə əlaqəli teleqram kanalı məlumat yayıb.

Həbslərin səbəbləri barədə rəsmi açıqlama verilməyib. Saxlanmalar müxalifət tərəfdarlarına qarşı son vaxtlar artan təzyiqlər fonunda baş verir.

İyunun 25-də keçirilən xüsusi əməliyyat zamanı arxiyepiskop Baqrat Qalstanyan və daha 16 nəfər həbs olunmuşdu. Ermənistan İstintaq Komitəsinin məlumatına görə, onlara qarşı terror aktına hazırlıq, kütləvi iğtişaşların təşkili və hakimiyyətin zorla ələ keçirilməsinə cəhd ittihamları irəli sürülüb.

Baş nazir Nikol Paşinyan baş verənləri “kriminal-oliqarxik-klerikal planın” qarşısının alınması kimi dəyərləndirib.

N.Təbrizli