İsrailin 12 günlük hücumları nəticəsində İranda 1 060 nəfər həlak olub

İranın Şəhidlər və Veteranlar Fondu bildirir ki, İsrailin son 12 gün ərzində İrana qarşı həyata keçirdiyi hücumlar nəticəsində 1 060 nəfər həyatını itirib. Fondun rəhbəri Səid Ohadi bu məlumatı bazar ertəsi günü İranın dövlət televiziyasında çıxışı zamanı açıqlayıb.

“Bu axşam etibarilə İsrail rejiminin İrana qarşı apardığı hücumlar nəticəsində həyatını itirən 1 060 nəfəri dəfn etmişik,” –  o bildirib.

Bu, rəsmi olaraq təsdiqlənən ən son statistikadır və əvvəlki rəqəmlərlə müqayisədə artım göstərir. Daha öncə İran rəsmiləri hücumlar zamanı 935 nəfərin həlak olduğunu açıqlamışdılar.

İsrail və İran arasında eskalasiya son günlərdə kəskin şəkildə artıb. İsrail ordusu bu müddət ərzində İran ərazisindəki müxtəlif hərbi obyektləri və infrastruktur nöqtələrini hədəfə alıb. Təl-Əviv bu əməliyyatların, İranın bölgədəki proksi qüvvələri vasitəsilə həyata keçirdiyi hücumlara cavab olduğunu bildirir.

Tehran isə İsrailin hərbi fəaliyyətlərini suverenliyinə qarşı açıq hücum kimi qiymətləndirir və beynəlxalq ictimaiyyəti İsraili dayandırmağa çağırır.

Ölənlərin əksəriyyətinin mülki şəxslər olduğu bildirilir, lakin bu məlumatlar hələlik müstəqil mənbələr tərəfindən təsdiqlənməyib.

N.Təbrizli