Zelenski Çin şirkətlərinə qarşı sanksiyalar tətbiq etdi

Ukrayna Prezidenti Volodimir Zelenski Rusiyanın 4 iyulda Kyivə hücumunda istifadə etdiyi İran istehsalı “Shahed” dronlarında komponentləri aşkar edilən beş Çin şirkətinə qarşı sanksiyalar tətbiq edib.

Prezidentin sanksiya məsələləri üzrə müşaviri Vladislav Vlasuk bildirib ki, sanksiyalar Ukrayna Təhlükəsizlik və Müdafiə Şurasının qərarına əsasən 2024–2025-ci illərdə rus şirkətlərinə məhsul tədarük etmiş firmaları əhatə edir.

Sanksiyaya məruz qalan şirkətlər arasında Ningbo BLIN Machinery Co., Ltd, Suzhou ECOD Precision Manufacturing, Shenzhen Jinduobang Technology Co., Ltd, Shenzhen Royo Technology Co., Ltd və Central Asia Silk Road International Trade (Tianjin) Co., Ltd yer alır.

Yeni tədbirlər aktivlərin dondurulmasını, ticarət və tranzit məhdudiyyətlərini, kapital axınına qadağanı və lisenziyaların dayandırılmasını nəzərdə tutur. Sanksiyalar 10 il müddətinə qüvvədə olacaq.

Ukrayna, Rusiyaya əməkdaşlıq edən istehsalçılara qarşı beynəlxalq tərəfdaşlarla sanksiyaların genişləndirilməsi üzrə məsləhətləşmələrə başlayıb.

İyulun 4-də Kyivə edilən hücum nəticəsində mülki obyektlər ziyan görüb, bəzi ərazilərdə qaz verilişi kəsilib və ölənlər olub.