Ermənistan parlamenti müxalif deputat Sarkisyanın həbsi üçün razılıq verib

Ermənistan parlamenti qapalı və gizli səsvermə nəticəsində “Ermənistan” fraksiyasının deputatı Artur Sarkisyanın həbsinə razılıq verib. O, konstitusiya quruluşunu devirmək məqsədilə terror aktına hazırlıqda ittiham olunur.

Yerli mətbuata görə, Baş Prokurorun təqdimatını 62 deputat dəstəkləyib. Müxalifət fraksiyaları səsvermədə iştirak etməyib.

Sarkisyan ittihamları “siyasi təqib” adlandırıb və hüquq-mühafizə orqanlarını gözləmədən özü İstintaq Komitəsinin binasına gedərək təslim olub. Prokurorluq onun barəsində məhkəməyə həbs vəsatəti təqdim edəcək.

Sarkisyan bu iş üzrə daha əvvəl həbs olunan arxiyepiskop Baqrat Qalstanyanın yaxın silahdaşı sayılır.

N.Təbrizli