Ukrayna Trampın “17 Patriot” vədini dəqiq anlamayıb

ABŞ-ın  prezidenti Donald Trampın Ukraynaya 17 ədəd Patriot zenit-raket kompleksi göndəriləcəyinə dair bəyanatının dəqiq mənası Kiyevə hələ də məlum deyil. Bu barədə Ukrayna Müdafiə Nazirliyinin Baş Kəşfiyyat İdarəsi rəis müavini Vadim Skibitski The Guardian qəzetinə bildirib.

“Biz dəqiq bilmirik, Tramp nəyi nəzərdə tutub”, –  Skibitski qeyd edib.

Onun sözlərinə görə, bu, raketlər, buraxıcı qurğular və ya bütöv batareyalar ola bilər.

Skibitski bildirib ki, bir Patriot batareyasında altı buraxıcı qurğu olur. Almaniya və Niderland tərəfindən Ukraynaya vəd olunan üç batareya ümumilikdə 18 qurğudan ibarətdir ki,  bu da Trampın səsləndirdiyi 17 rəqəminə yaxındır.

O əlavə edib ki, Ukrayna bu məsələ ilə bağlı ABŞ administrasiyasından əlavə məlumat gözləyir.

Skibitski həmçinin bildirib ki, iyulun əvvəlində Tramp və Zelenski arasında Tomahawk qanadlı raketlərinin ötürülməsi məsələsi müzakirə olunub, lakin ABŞ sonradan bu niyyətdən imtina edib.

N.Təbrizli