Silent Crow haker qrupu Aeroflotun İT infrastrukturuna genişmiqyaslı hücum etdiyini iddia edir

 Silent Crow adlı haker qrupu Rusiya dövlət aviaşirkəti Aeroflotun daxili informasiya texnologiyaları (İT) infrastrukturunu genişmiqyaslı kiberhücumla tamamilə məhv etdiyini açıqlayıb. Bu barədə məlumat qrupun Telegram kanalında yerləşdirilib.

Hakerlərin iddiasına görə, "Kiber Partizanlar" adlı başqa bir qrupla əməkdaşlıq çərçivəsində bir il ərzində Aeroflotun korporativ şəbəkəsinə daxil olublar və təxminən 7000 fiziki və virtual serveri sıradan çıxarıblar.

Silent Crow həmçinin bildirib ki, onlar uçuş tarixçəsi məlumat bazalarını əldə edib, kritik korporativ sistemləri iflic vəziyyətə salıb, işçilərin şəxsi kompüterlərinə və idarəetmə sistemlərinə giriş əldə ediblər. Qrup eyni zamanda ekipaj nəzarəti və monitorinq sistemlərindən də məlumatlar kopyaladığını iddia edir.

Hakerlər bu əməliyyatı Rusiyanın hüquq-mühafizə orqanlarına və əsas infrastrukturun müdafiəsinə məsul qurumlara bir mesaj olaraq qiymətləndirib. Daha əvvəl Silent Crow Rostelecom və Rosreestr kimi dövlət qurumlarına qarşı da oxşar hücumlar həyata keçirdiyini bildirmişdi.

Hazırda Aeroflot və Rusiya rəsmiləri bu iddialarla bağlı ictimai şərh verməyiblər.

Gülnar