Putin Zelenski ilə görüşə hazır olduğunu bildirib

Rusiya prezidenti Vladimir Putin ukraynalı həmkarı Volodimir Zelenski ilə görüşün mümkün olduğunu deyib. O, ABŞ prezidenti Donald Trampla görüşün yaxın günlərdə baş tutacağını və görüş yerinin artıq razılaşdırıldığını bildirib.

Putinin sözlərinə görə, Birləşmiş Ərəb Əmirlikləri Trampla görüş üçün “uyğun məkanlardan biridir”. Rusiya və ABŞ rəsmiləri görüşün "yaxın günlərdə" keçiriləcəyini təsdiqləyib.

Bloomberg-in məlumatına görə, Tramp bu görüş zamanı Ukraynada atəşkəs imkanlarını, o cümlədən “ərazilərin mübadiləsi” məsələsini müzakirəyə çıxarmağı planlaşdırır.

ABŞ-ın Rusiya ilə diplomatik təmaslarının fəallaşdığı, o cümlədən Qərb sanksiyalarının qismən azaldılması və NATO genişlənməsinə yazılı təminatların verilməməsi məsələlərinin müzakirə olunduğu bildirilir.

Ukrayna prezidenti Zelenski isə bildirib ki, görüş yalnız real atəşkəs və davamlı sülhə nail olmaq məqsədilə keçirilməlidir.

O, bu istiqamətdə ABŞ və Avropa liderləri ilə məsləhətləşmələr apardığını qeyd edib.

N.Təbrizli