Tramp Rusiya ilə Ukrayna arasında ərazi mübadiləsinin olacağına inanır

ABŞ Prezidenti Donald Tramp bu cümə Rusiya Prezidenti Vladimir Putinlə planlaşdırılan görüşdə Ukraynaya bəzi ərazilərin qaytarılması məsələsini gündəmə gətirəcəyini bildirib.

Tramp bu barədə bu gün keçirilən mətbuat konfransında danışıb.

“Rusiya Ukraynanın böyük bir hissəsini işğal edib. Biz bu ərazinin bir hissəsinin Ukraynaya qaytarılmasına çalışacağıq”, – deyə o, qeyd edib.

Prezident bildirib ki, Rusiya və Ukrayna arasında ərazi mübadiləsi mümkündür və bunun Ukrayna üçün həm müsbət, həm də mənfi nəticələri ola bilər.

Trampın sözlərinə görə, Alyaskada keçiriləcək görüş müharibənin dayandırılması üçün Putinlə danışıqlar aparmaq məqsədi daşıyır. Görüş zamanı ərazi ilə bağlı razılaşmanın mümkünlüyü də nəzərdən keçiriləcək.

O əlavə edib ki, Putin danışıqlar zamanı ədalətli bir təklif irəli sürərsə, bu barədə Avropa liderlərinə məlumat verəcək.

Tramp həmçinin Rusiya Prezidentinə Ukraynadakı müharibəni dayandırmağı təklif etməyi planlaşdırdığını bildirib və qeyd edib ki, Putin münaqişəni sonlandırmaq istədiyini ifadə edib.

Buna baxmayaraq, Tramp vurğulayıb ki, Rusiya lideri onu əvvəllər də məyus edib.

“Düşünürəm ki, Putinlə görüş yaxşı keçəcək, amma pis də ola bilər”, – deyə o, çıxışını yekunlaşdırıb.