Putin Alyaska sammitindən əvvəl Maqadanda olub

 Rusiya prezidenti Vladimir Putin cümə axşamı Maqadana səfər edib. Səfər çərçivəsində onun balıq emalı zavodu, mədəniyyət mərkəzi və idman kompleksi ilə tanış olacağı, həmçinin Maqadan vilayətinin qubernatoru Sergey Nosovla görüşəcəyi gözlənilir. Bu barədə“İnterfaks” Kremlin sözçüsü Dmitri Peskova istinadla xəbər verir.

“Ölkəmizin coğrafiyasını nəzərə alaraq, prezident heç vaxt regionlarla bağlı məsələlərlə məşğul olmaq fürsətini əldən vermir,” –  Peskov jurnalistlərə bildirib.

Putin daha sonra Alyaskaya yola düşəcək. ABŞ prezidenti Donald Trampla görüş Ankoricdəki Elmendorf-Richardson hərbi bazasında keçiriləcək.

Ağ Ev bildirib ki, sammit yerli vaxtla saat 11:00-da (Bakı vaxtı ilə 22:00) başlayacaq. Görüşdə Rusiya-Ukrayna müharibəsinə son qoyulması müzakirə ediləcək.

Sammit ərəfəsində Ankoricdə Ukraynanı dəstəkləyən fəallar aksiya keçirib, görüş günü də yeni etirazlar gözlənilir.

N.Təbrizli