İstanbulun daha bir rayon rəhbəri həbs edilib

Türkiyə məhkəməsi çərşənbə axşamı İstanbulun mərkəzi Bəyoğlu rayonunun rəhbəri İnan Güneyin həbsinə qərar verib. O, şəhər meriyasında korrupsiya işi üzrə saxlanılan doqquzuncu rayon rəhbəri olub, – türk mediası bildirib.

Müxalifətçi Cümhuriyyət Xalq Partiyasının (CHP) üzvü olan Güney 15 avqustda saxlanılıb. O, 2024-cü ilin martında 49%-dən çox seçicinin dəstəyi ilə Bəyoğlu rayonunun rəhbəri seçilib.

Məlumata görə, məhkəmə iş üzrə ümumilikdə 17 nəfərin, o cümlədən Güneynin həbsi barədə qərar çıxarıb. Ona reklam lövhələrindən qeyri-qanuni gəlir əldə etmək ittihamı irəli sürülüb, lakin Güney iddiaları rədd edib.

Mart ayından bəri İstanbulun vəzifəsindən kənarlaşdırılmış meri Əkrəm İmamoğlu da həbsdə saxlanılır.

N.Təbrizli