Nazirlik bu çimərliklərlə bağlı xəbərdarlıq edib

Bakı, Lənkəran və Xaçmaz rayonlarında yerləşən bir sıra çimərliklərdə dəniz suyunun keyfiyyət göstəricilərinin normativ tələblərə uyğun olmaması səbəbindən çimmək müvəqqəti olaraq qadağan edilib. Bu barədə Səhiyyə Nazirliyi məlumat yayıb.

Nazirliyin açıqlamasına görə, laborator müayinələr zamanı bəzi ərazilərdən götürülmüş dəniz suyu nümunələrində kimyəvi və mikrobioloji göstəricilərin qüvvədə olan sanitariya norma və qaydalarının tələblərinə cavab vermədiyi müəyyən olunub.

Monitorinqlər nəticəsində Bakı şəhərinin Xəzər rayonunun Türkan, Suraxanı rayonunun Hövsan, Səbail rayonunun Şıx, Qaradağ rayonunun Sahil qəsəbələrində, həmçinin Lənkəran şəhərinin Aşağı Nüvədi qəsəbəsi, Sütəmurdov kəndi, Kiçik Bazar yaşayış məntəqəsi və Xaçmaz rayonunun Niyazoba ərazisində yerləşən çimərliklərdə normativdən kənar göstəricilər aşkarlanıb.

Məlumatda qeyd olunur ki, dəniz suyunun keyfiyyətinin pisləşməsi sanitariya-mühafizə zonalarının tullantı və çirkab suları ilə çirklənməsi nəticəsində baş verib.

Mövcud vəziyyət nəzərə alınaraq, əhalinin sağlamlığının qorunması məqsədilə Respublika Gigiyena və Epidemiologiya Mərkəzi tərəfindən həmin çimərliklərdə, eləcə də ərazilərdə fəaliyyət göstərən qeyri-qanuni çimərlik sahələrində dəniz suyundan çimmək məqsədilə istifadənin müvəqqəti məhdudlaşdırılması barədə qərar qəbul olunub.

Qərarın icrası ilə bağlı Bakı Şəhər, Lənkəran Şəhər və Xaçmaz Rayon İcra hakimiyyətləri, aidiyyəti polis orqanları, Fövqəladə Hallar Nazirliyi, eləcə də Azərbaycan Dövlət Su Ehtiyatları Agentliyinin müvafiq qurumları məlumatlandırılıb.