Manatın nominal və real effektiv məzənnələri artıb

Bu il avqustun 1-ə Azərbaycan manatının xarici valyutalara nisbətdə ümumi nominal effektiv məzənnəsi 104,9 faiz bəndi təşkil edib.

Mərkəzi Bankın məlumatları əsasında aparılan hesablamaya görə, bu göstərici aylıq müqayisədə 1,4 faiz bəndi, ötən ilin eyni dövrü ilə müqayisədə isə 3,1 faiz bəndi artıb.

Eyni zamanda, cari il avqustun 1-ə manatın qeyri-neft sektoru üzrə nominal effektiv məzənnəsi 176,4 faiz bəndinə çatıb ki, bu da əvvəlki ayla müqayisədə 2,6 faiz bəndi, ötən ilin eyni dövrü ilə müqayisədə isə 3,7 faiz bəndi artımdır.

Bundan əlavə, 2026-cı ilin 1 avqust tarixinə manatın ümumi real effektiv məzənnəsi 116 faiz bəndi olub. Bu göstərici aylıq ifadədə 0,8 faiz bəndi, illik ifadədə isə 2,3 faiz bəndi artıb. Hesabat dövründə qeyri-neft sektoru üzrə manatın real effektiv məzənnəsi 110,6 faiz bəndi təşkil edib (aylıq ifadədə 1,1 faiz bəndi artım, illik ifadədə isə sabit).

AMB sədri Taleh Kazımovun sözlərinə görə, manatın möhkəmlənməsi və valyuta bazarında müşahidə olunan proseslər bir neçə amillə bağlıdır.

 “Nağd valyuta bazarında dolları əsasən fiziki şəxslər satır, eyni zamanda manat əmanətlərinin həcmi və unikal əmanətçilərin sayı artmaqda davam edir. İdxalın azalması xarici valyutaya tələbi zəiflədir, manatın ticarət tərəfdaşlarının valyutalarına qarşı möhkəmlənməsi isə idxal olunan inflyasiyanın azalmasına şərait yaradır”, - Kazımov bildirib. 

N.Təbrizli