Azərbaycan-Türkiyə V Enerji Forumu çərçivəsində İşçi Qruplarının iclası keçirilib

Bakıda keçirilən Azərbaycan-Türkiyə V Enerji Forumu çərçivəsində Azərbaycanın energetika naziri Pərviz Şahbazov və Türkiyənin energetika və təbii sərvətlər naziri Alparslan Bayraktarın iştirakı ilə 6 İşçi Qrupunun birgə iclası baş tutub. İclasda karbohidrogen və neft-kimya, elektrik enerjisi bazarı, ötürmə və paylama, tənzimləmə, enerji səmərəliliyi və mədənçilik üzrə işçi qrupları rəhbərlərinin məruzələri dinlənilib.

Tərəflər təbii qaz tədarükü, qaz infrastrukturu, rəqəmsallaşma, interkonnektor xətləri, enerji saxlanc sistemləri, ağıllı sayğaclar və "Sərhəddə Karbon Tənzimləmə Mexanizmi" üzrə tərəfdaşlığın genişləndirilməsini razılaşdırıblar. Eyni zamanda dənizdə külək enerjisi, bərpaolunan enerjinin şəbəkəyə inteqrasiyası, aktiv istehlakçı modeli və yaşıl enerji ixracının tənzimlənməsi istiqamətində təcrübə mübadiləsinin dərinləşdirilməsi qərara alınıb.

Enerji səmərəliliyi sahəsində isə məcburi enerji auditi subyektlərində monitorinq, ESCO bazarının inkişafı, binaların enerji pasportlaşdırılması və emissiyaların rəqəmsal hesablanması üzrə birgə fəaliyyətlərin həyata keçirilməsi barədə razılıq əldə edilib.

N.Təbrizli