Türkiyə üçün əla şans: “Avro-2016”ya birbaşa necə gedə bilər?

Türkiyə millisi bu gün "Avro-2016”nın final mərhələsinə birbaşa vəsiqə əldə edə bilər.

Qol.Az-ın xəbərinə görə, Fatih Terimin komandasının ən yaxşı qrup üçüncüsü olaraq Fransaya getmək imkanı yaranıb.

Bunun üçün hazırda ehtiyatında 15 xalı olan Türkiyə millisinin bu gün öz meydanında qrupunun lideri İslandiyanı məğlub edib xalını 18-ə yüksəltməsi vacibdir. Amma bununla da iş bitmir. Goal.com saytı yazır ki, qardaş ölkə komandasının "Avro-2016”ya birbaşa qatılması üçün hazırda onunla eyni qrupda yarışan və sonuncu yeri tutan Qazaxıstanın bu gün səfərdə Latviyaya qalib gəlməsi vacibdir.

Qaydalara əsasən, ən yaxşı qrup üçüncüsü kimi "Avro-2016”ya yeganə vəsiqə qrup üçüncüləri arasınsa ən çox xal toplayan komandalara verilir. Bu zaman üçüncü yeri tutan millinin qrup sonuncu olan komandayla oyunlarındakı nəticə nəzərə alınmır. Türkiyə millisi indiki halda öz qrupunda sonuncu olan Qazaxıstandan 6 xal alıb. Amma əgər qazaxlar Latviyaya səfərdə qalib gələrsə, o zaman sonuncu yeri tərk edib beşinci pilləyə yüksələcəklər. Bu zaman qazaxlar üzərində qazanılmış 6 xal hesaba alınacaq və Türkiyənin qrup üçüncüləri arasında xalı 16-ya yüksələcək. Amma qeyd etdiyimiz kimi, bu zaman Türkiyənin İslandiyaya qalib gəlməsi də vacibdir.

Qeyd edək ki, Türkiyə üçün belə bir imkan ən yaxşı qrup üçüncülüyü uğrunda yarışan və dünənə qədər buna daha çox şansı olan Ukrayna millisinin yer aldığı qrupdakı son turun oyunlarından sonra yaranıb. Ukrayna öz meydanında İspaniyaya uduzaraq qrupu 19 xalla üçüncü yerdə tamamlayıb. Onlar 19 xalın 6-sını sonuncu yeri tutan Makedoniya ilə matçlarda qazanıb. Beləliklə, qrup üçüncüləri arasında Ukraynanın xalının 13-ə endiyini görürük.

Deməli, Türkiyə  İslandiyanı məğlub etməklə yanaşı, qazaxların Latviyaya səfərdə qalib gəlməsini gözləməlidir.