Simeone: "Münhenə finala yüksələcəyimizə inanaraq gedəcəyik"

"Birinci hissədə yaxşı oynadıq. Ancaq ikinci hissədə  üstün tərəf rəqib idi. Buna baxmayaraq,  biz yenə də inamlı təsir bağışladıq və yaxşı müdafiə olunduq".

Qol.az-ın İspaniya mətbuatına istinadən yaydığı xəbərə görə, bu sözləri "Atletiko"nun (Madrid) baş məşqçisi Dieqo Simeone Çemionlar Liqasının yarımfinalında "Bavariya" ilə ilk oyundan (1:0) sonra deyib.

O, bu nəticə ilə hansı komandanın finala yüksələcəyinin hələ müəyyənləşmədiyini bildirib:

"Onu deyə bilərəm ki, Münhenə finala yüksələcəyimizə inanaraq gedəcəyik. Cavab qarşılaşmasında "Bavariya"ya azarkeş dəstəyi olacaq. Biz isə səfərdə qol vurmağa çalışacağıq".

Argentinalı mütəxəssis komandasının qələbə qolunu vuran Saul Niqes haqda da danışıb:

"O, həmişə qol vurmaq istəyir. Niqesin çox gözəl fərdi bacarıqları var. O, hamını təəccübləndirməyə davam edəcək. Niqesə inanıram".