Didye Deşam: "Çempion olmaq istəyirik"

"5 qollu qalibiyyət oldu. Ancaq 2 qol buraxdığımızı da unutmamalıyıq. Qapımızda qollar gördüyümüz zaman oyunu taleyi həll olunmuşdu. Artıq yarımfinaldayıq. Azarkeşlərimizi sevindirməyi bacardıq".

Qol.az-ın xarici KİV-lərə istinadən yaydığı xəbərə görə, bu sözləri Fransa millisinin baş məşqçisi Didye Deşam "Avro-2016"nın 1/4 finalında İslandiyaya 5:2 hesabı ilə qalib gəldikləri oyundan sonra deyib.

O, birinci hissədə artıq görüşün taleyinin həll olunduğunu bildirib:

"Buna görə də ikinci hissəyə rahat başladıq. Jiru və Koselnini cəzalı durumla düşməməkdən ötrü əvəzlədim".

D.Deşam Almaniya ilə oynayacaqları yarımfinal qarşılaşması haqda da danışıb:

"Almaniya yaxşı futbol oynayan komandadır. Onlar İtaliya qarşısında bunu bir daha göstərdilər. Çempion olmaq istəyirik. Təkcə Avropanın deyil, dünyanın ən güclü komandasına bütün gücümüzü göstərməyə çalışacağıq".