Futbol üzrə milli komandaların qiyməti açıqlandı

Rusiyanın "Sport-Ekspress" qəzeti AVRO-2016-nın seçmə mərhələsində mübarizə aparan ölkələrin yığma komandalarının qiymətlərinə əsasən reytinqlərini müəyyənləşdirib.

ANN.Az "Report"a istinadən xəbər verir ki, təşkilatçı Fransa millisinin də yer aldığı siyahıda ölkələr seçmə mərhələdə olduğu kimi 9 qrupa bölünüblər.

Azərbaycan millisi 7-ci qrupa düşüb. Futbolçularına üst-üstə 6,55 milyon avro qiymət qoyulan komanda 53 ölkə yığması arasında 45-cidir. Seçmə mərhələdəki rəqiblərdən dəyəri 330,5 milyon avro olan İtaliya 3-cü, 251,6 milyon avro ilə qiymətləndirilən Xorvatiya 4-cü qrupa düşüb. Onlar ümumi sıralamada 6-7-ci yerləri bölüşdürürlər. Norveç (42,7 milyon avro, 28) və Bolqarıstan (37,4 milyon avro, 31) 6-cı, Malta (2,4 milyon avro, 49) 7-ci qrupdadır. Qeyd edək ki, 1-ci qrupda dəyəri yarım milyard avronu ötən İspaniya (505 milyon avro), 2-ci qrupda 416 milyon avro qiyməti olan Almaniya yer alıb. 9-cu qrupa isə Fransa daxil edilib. 386,5 milyon avro dəyərə malik təşkilatçı ölkəyə konkret yer verilməyib.