Gürcüstanda marixuananın qanuniləşdirilməsini təxirə saldılar

Parlament bunu ölkədə baş verən son hadisələrlə əlaqədar yersiz adlandırıb.

Oxu.Az xəbər verir ki, bu barədə "Novosti Qruziya"nın müxbirinə qanun layihəsinin müəllifi və təşəbbüskarı, deputat Qoqa Xaçidze bildirib.

İyunun 14-də Tbilisidə dağıdıcı daşqın baş verib. Son məlumatlara görə, 19 nəfər həlak olub, üç nəfər yaralanıb.

"Biz qanun layihəsinin baxış vaxtını dəyişdik, çünki hesab etdik ki, indi onu nəzərdən keçirməyin vaxtı deyil. Qanun layihəsi gələn həftə səhiyyə və sosial müdafiə komitəsinin iclasında nəzərdən keçiriləcək. Biz 13 iyunla əlaqədar bu tarixi artıq ikinci dəfədir ki, təxirə salırıq", - deyə, Xaçidze bildirib.

Xaçidzenin təşəbbüsünə əsasən, Gürcüstanda marixuananın hazırlanması, alınması, saxlanılması yaxud istifadəsi cinayət məsuliyyəti nəzərdə tutmamalıdır. Qanun layihəsi parlamentdə iyunun 28-də qeydə alınıb.