Sarkisyanla bağlı məhkəmə keçiriləcək

Ermənistanın sabiq prezidenti Serj Sarkisyan barəsində 3 milyon ABŞ dolları məbləğində rüşvət almaq ittihamı ilə irəli sürülən cinayət işinin materialları ittiham aktı ilə birlikdə məhkəməyə təqdim edilib.

Erməni KİV-lərinin məlumatına görə, istintaq materiallarında Sarkisyanın iş adamı Silva Ambarkumyanın ona məxsus şirkətin satışına mane olmaması müqabilində vasitəçilər vasitəsilə rüşvət aldığı iddia edilir.

İttihama əsasən, 2 milyon 660 min dollar məbləğində rüşvət nağd şəkildə, 325 min dollar isə bank köçürməsi ilə Sarkisyana çatdırılıb.

Cinayət işində həmçinin Ermənistanın Vatikandakı keçmiş səfiri, Sarkisyanın kürəkəni Mikael Minasyan və iş adamı Samvel Mayrapetyan da ittiham olunur.

N.Təbrizli