Almaniya kansleri Mers İsraili tənqid edib

Almaniyanın kansleri Fridrix Mers İsrailin Qəzza zolağındakı hərbi əməliyyatlarını tənqid edib və bölgədəki vəziyyəti “qəbuledilməz” adlandırıb.

“Mənə İsrail hökumətinin Qəzzada həftələrlə etdiyi hərəkətlər xoş deyil,” — Mers ARD telekanalına müsahibəsində bildirib.

O, məsələni dəfələrlə İsrailin baş naziri Benyamin Netanyahu ilə müzakirə etdiyini vurğulayıb.

“Ümid edirəm ki, biz avropalılar və amerikalılar birlikdə iki dövlət əsasında münaqişənin həllinə gətirib çıxaracaq bir yol tapa biləcəyik,” — kansler əlavə edib.

Mers həmçinin bildirib ki, fələstinlilərin yaşamaq üçün öz ərazilərinə sahib olmaq hüququ var.

“Qəzzadakı hazırkı vəziyyət qəbuledilməzdir,” —  o qeyd edib.

 İsrail ordusu mayın 18-də Qəzzanın şimal və cənub hissələrində genişmiqyaslı quru əməliyyatına — “Gideonun Ərəbələri” adlı kampaniyaya başlayıb.

Əməliyyatın məqsədi HƏMAS-ın tam məğlub edilməsi və girov götürülmüş israillilərin azad olunmasıdır.

Baş nazir Netanyahu bildirib ki, əməliyyatdan sonra İsrail ordusu Qəzza zolağının tam nəzarətini ələ keçirməyi planlaşdırır.

N.Təbrizli