ABŞ Rusiyanın iri neft şirkətlərinə sanksiya tətbiq edib, Tramp Putinlə görüşü ləğv edib

ABŞ administrasiyası Moskvanı Ukraynada müharibənin dayandırılmasına sadiq qalmamaqda ittiham edərək, Rusiyanın iri neft şirkətləri “Rosneft” və “Lukoil”ə qarşı yeni sanksiyalar tətbiq edib.

Maliyyə Nazirliyinin qərarı ilə eyni vaxtda ABŞ prezidenti Donald Tramp Rusiya prezidenti Vladimir Putinlə planlaşdırılmış görüşünü ləğv edib.

Tramp mətbuat konfransında deyib ki, görüşün “indi doğru zaman olmadığını” düşündüyü üçün bu qərarı verib.

“Prezident Putinlə görüşü ləğv etdik. Mən hiss etdim ki, bu, düzgün olmayacaq, istədiyimizi ala bilməyəcəyik,” – Tramp NATO-nun baş katibi Mark Rutte ilə Ağ Evdə keçirdiyi birgə brifinqdə bildirib.

Tramp əlavə edib ki, Putinlə yeni görüş gələcəkdə keçirilə bilər, lakin tarix hələ müəyyənləşməyib. O, Rusiya lideri ilə təmaslarının nəticəsiz qalmasından təəssüf etdiyini də qeyd edib.

Aytac