Rusiya XİN əcnəbiləri Kiyevi tərk etməyə çağırıb

Rusiya Xarici İşlər Nazirliyi (XİN) əcnəbilərə Kiyevi dərhal tərk etməyi, paytaxt sakinlərinə isə hərbi və inzibati obyektlərdən uzaq durmağı tövsiyə edib.

Nazirliyin “Telegram” kanalında yayımlanan bəyanatda Ukrayna Silahlı Qüvvələrinin mayın 22-də Starobelskdəki kollecə həyata keçirdiyi hücumun “gərginliyi artırdığı” qeyd olunur.

Bildirilib ki, bu hadisədən sonra Rusiya Silahlı Qüvvələri Kiyevdə Ukraynanın müdafiə sənayesi müəssisələrinə, o cümlədən pilotsuz uçuş aparatlarının istehsalı və hazırlanması ilə bağlı obyektlərə, eləcə də qərarqəbuletmə və komanda mərkəzlərinə zərbələr endirməyə başladığını açıqlayıb.

Rusiya tərəfi həmin obyektlərin paytaxtın müxtəlif ərazilərində yerləşdiyini bildirərək, xarici diplomatlar da daxil olmaqla bütün əcnəbilərin şəhəri tərk etməsini, yerli əhalinin isə hərbi və inzibati infrastrukturdan uzaq durmasını tövsiyə edib.