İordaniya İrana etiraz notası təqdim edib

İordaniya Xarici İşlər Nazirliyi ölkə ərazisinə davam edən hücumlarla əlaqədar Əmmandakı İran səfirliyinin müvəqqəti işlər vəkilini nazirliyə çağıraraq etiraz notası təqdim edib. Bu barədə XİN-in sözçüsü Fuad əl-Məcali bildirib. 

Nazirliyin məlumatına görə, İordaniya tərəfi İran nümayəndəsindən Tehrana krallığa qarşı hücumların dərhal dayandırılmasının vacibliyi ilə bağlı rəsmi mesajın çatdırılmasını tələb edib. XİN bəyan edib ki, ölkənin təhlükəsizliyi və vətəndaşlarının həyatı "qırmızı xətt"dir. 

Fuad əl-Məcali bildirib ki, Əmman İranın hərəkətlərini İordaniyanın suverenliyinin, beynəlxalq hüququn və BMT Nizamnaməsinin pozulması kimi qiymətləndirir. 

Bundan əvvəl İordaniya Silahlı Qüvvələri hava hücumundan müdafiə sistemlərinin ölkə ərazisinə doğru buraxılan dörd İran raketindən üçünü zərərsizləşdirdiyini açıqlamışdı.