CENTCOM Yaxın Şərq xəritəsini dəyişib

ABŞ Silahlı Qüvvələrinin Mərkəzi Komandanlığı (CENTCOM) komandan admiral Bred Kuperin Yaxın Şərq səfəri ilə bağlı paylaşımında istifadə etdiyi region xəritəsini dəyişib.Bunu CENTCOM-un “X” sosial şəbəkəsindəki hazırkı paylaşımı və istifadəçilər tərəfindən saxlanılan ilkin versiyanın görüntüləri göstərir.

İlkin xəritədə Qəzza zolağı və İordan çayının Qərb sahili vizual olaraq İsrail ərazisinin tərkibində göstərilib. Yenilənmiş versiyada isə İsrail və Fələstin ərazilərinin sərhədləri fərqli təsvir olunub.

Paylaşım CENTCOM komandanı admiral Bred Kuperin Yaxın Şərqə 10 günlük səfərinin başa çatması ilə bağlı olub. Səfər çərçivəsində Kuper Bəhreyn, İraq, İsrail, İordaniya, Səudiyyə Ərəbistanı və Birləşmiş Ərəb Əmirliklərinə səfər edib. O, həmçinin Ərəbistan dənizində xidmət aparan ABŞ-ın “USS Abraham Lincoln” aviadaşıyıcısında olub.

CENTCOM xəritənin dəyişdirilməsinin səbəbi ilə bağlı açıqlama verməyib.