Ali Məhkəmə döyülən jurnalistin şikayətini təmin etmədi - VİDEO

 

Ali məhkəmədə baş tutan iclasda Gəncə Apellyasiya Məhkəməsinin 2 illik azadlığın məhdudlaşdırılması qərarı qüvvədə qalıb.

 

Zaur Qənbərovu 2020-ci ilin oktyabrın 29-da Gədəbəy Rayon Məhkəməsi 3 il 6 ay azadlıqdan məhrum edib. Jurnalistin iddiasına görə, həbs edilməsinin səbəbi Gədəbəy rayonu məmurları haqqında yazdığı araşdırma məqalələri olub. Qənbərov bildirib ki, həbsi onun jurnalist fəaliyyətinin məhdudlaşdırılmasına yönəlib. Məhkəmədən isə bildirilib ki, 2020-ci il mayın 4-də Dövlət Sosial Müdafiə Fondunun (DSMF) Gədəbəy rayon şöbəsinin binasında yaranan insidentlə bağlı həbs edilib.

 

"2020-ci il mayın 4-də peşə vəzifəmi yerinə yetirdiyim zaman Dövlət Sosial Müdafiə Fondunun (DSMF) Gədəbəy rayon şöbəsinin binasında həmin qurumun rəhbəri və onun sürücüsü tərəfindən döyülmüşəm, təhqir olunmuşam, çəkiliş apardığım telefonum sındırılıb. Bununla bağlı hüquq- mühafizə orqanlarına şikayət etsəm də qarşı tərəfə deyil, mənə qarşı Cinayət Məcəlləsinin 221.3 maddəsi (xuliqanlıq-silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) ilə cinayət işi qaldırılıb,” o qeyd edib.

 

Jurnalist etiraz olaraq həmin ilin iyulunda aclıq aksiyası keçirib.

 

Həmçinin, müxbir verilən hökmündən Apellyasiya Məhkəməsinə şikayət verib. Gəncə Apellyasiya Məhkəməsi müxbirin azadlığını 2 illik məhdudlaşdırıb və ona elektron qolbaq taxıb.

 

"Sərhədsiz Reportyorlar" beynəlxalq mətbuatı müdafiə təşkilatının ötən il yaydığı bəyanatda deyilir ki, jurnalistə hücuma səbəb COVID 19 pandemiyası dövründə yardımın ədalətli paylanmaması haqqında video olub. "Hadisə araşdırılmalıdır. Cəzasızlığa yox deyirik!" bəyanatda qeyd edilir.