Tofiq Yaqublu iyulun 13-də dinc aksiya keçirəcək

"Təşəbbüs mənə aid olduğundan şəhər İcra Hakimiyyətinə xəbərdarlıq məktubunu da özüm yazmışam. Bu, başlanğıcdır və həm də cəmiyyətin kütləvi dinc etiraz aksiyalarına nə qədər hazır olduğunu yoxlamaq üçün bir testdir.  Quru sərhədlərin  çox absurd olaraq bağlı saxlanması əhalinin kifayət qədər böyük hissəsinə ciddi problem yaradır. Sizlərdən bu məsələyə biganə qalmamağı və həmin  günədək bu vacib aksiyaya dəstək verməyinizi xahiş edirəm", - o deyib.

 

Daxili İşlər Nazirliyinin mətbuat xidmətinin əməkdaşı, polis baş leytenantı Zeyni Hüseynov aksiyanın qarşısının alınacağını bildirib.

 

"Qanunvericiliyə uyğun olaraq, icra hakimiyyəti ilə razılaşdırılmayan istənilən qanunsuz aksiyanın, yaxud aksiyaya cəhdlərin qarşısı alınacaqdır", - o bildirib.

 

Azərbaycan 2020-ci ilin martında COVID-19 virusu yayılarkən pandemiyanın qarşısının alınması məqsədilə ölkə sərhədlərini gediş-gəlişə bağlayıb.   

Daha sonra müxtəlif ölkələrlə hava yolları vasitəsilə gediş-gəliş mərhələli şəkildə bərpa olunsa da, hökumət Türkiyə ilə Azərbaycan arasındakı Sədərək-Dilucu sərhəd-keçid məntəqəsi istisna olmaqla, digər qonşu ölkələrlə - İran, Rusiya və Gürcüstanla quru sərhədləri hələ də bağlı saxlayır.

Ləman Qasımova