Erməniləri Azərbaycana dəymiş ziyanı ödəməsinə məcbur etməliyik- Elnur Allahverdiyev

Erməni dövlətini Azərbaycana dəymiş ziyanı ödəməsinə məcbur etməliyik. Bunu Milli Məclisin bu gün keçirən iclasında çıxışı zamanı deputat Elnur Allahverdiyev deyib.

"Qarabağda hazırda iqtisadi inkişaf gedir. Minaların təmizlənməsi prosesi həyata keçirilir. Təklif edirəm ki, beynəlxalq səviyyədə Ermənistanın Azərbaycana vurduğu ziyanı sürətli şəkildə ictimailəşdirək. Qarabağda dağıdılan binalar, mədəniyyət evləri bir sözlə dəymiş ziyanı Ermənistan ödəməlidir. Sülh müqaviləsi altında bu məsələdən yayınmaq olmaz. Təklif edirəm, bu məsələ aktlaşdırmalıyıq və beynəlxalq məhkəmələr vasitəsilə bu problemi həll etməliyik”, - deputat bildirib. 

Prezident İlham Əliyev oktyabrın 13-də Astanada Asiyada Qarşılıqlı Fəaliyyət və Etimad Tədbirləri üzrə Müşavirənin 6-cı Zirvə Toplantısının plenar iclasında çıxışı zamanı deyib ki, Azərbaycana ərazilərin minalardan təmizlənməsi məsələsini həll etmək üçün, təxminən, 30 il və 25 milyard ABŞ dolları lazımdır

"Azərbaycan dünyada mina ilə ən çox çirklənmiş ölkələr sırasındadır. İlkin hesablamalara görə, Ermənistan işğal zamanı bir milyondan çox mina basdırıb. İkinci Qarabağ müharibəsinin başa çatmasından keçən iki il ərzində 250-dən çox Azərbaycan vətəndaşı mina partlayışları zamanı həlak olub və ya ağır yaralanıb. Beynəlxalq mütəxəssislərin hesablamalarına görə, Azərbaycana ərazilərin minalardan təmizlənməsi məsələsini həll etmək üçün təxminən 30 il və 25 milyard ABŞ dolları lazımdır”, - prezident bildirib.

Prezident onu da deyib ki, Azərbaycan işğaldan azad olunmuş ərazilərdə öz resursları hesabına genişmiqyaslı quruculuq işləri aparır.

www.anews.az