Azərbaycanda fəaliyyət göstərən məscidlərin sayı açıqlanıb

Ölkə ərazisində 2253 məscid var, onlardan 1500-ə qədəri gündəlik fəaliyyət göstərir. Bu barədə Milli Məclisin İctimai birliklər və dini qurumlar komitəsində keçirilən "Azərbaycanda dövlət-din münasibətləri: real durum və perspektivlər” adlı toplantıda Dini Qurumlarla İş üzrə Dövlət Komitəsinin sədri Mübariz Qurbanlı bildirib. 

"Azərbaycan çoxmillətli dövlətdir. Azərbaycan müstəqil olanda 17 məscid var idi. Eyni zamanda dini idarə edən kadrlar yox idi. Hazırda 2500 qədər məscid var ki, onlardan 1500-ə qədəri gündəlik fəaliyyət göstərir", - Mübariz Qurbanlı vurğulayıb.

 

Hazırda ölkədə Azərbaycan İlahiyyat İnstitutu və 5 dini təhsil müəssisə, 16 kilsə və 7 sinaqoq fəaliyyət göstərir.

Ölkə ərazisində ümumilikdə 748 pir və ziyarətgah müəyyən edilib.

İşğaldan azad olunmuş ərazilərdə indiyədək təsbit olunan tarixi-dini abidələrdən 67-si məscid, 139-u məbəd, 192-si ziyarətgahdır.  67 məsciddən (Şuşada 13, Ağdamda 5, Füzulidə 16, Zəngilanda 12, Cəbrayılda 5, Qubadlıda 8, Laçında 8) 65-i tamamilə, 2-i isə qismən dağıdılaraq yararsız hala salınıb.