Azərbaycanda buğdanın qiyməti bahalaşacaqmı?

Rusiya avqustun 23-dən ölkədən buğdanın ixrac rüsumunu bir ton üçün 4269,9 rubla qədər artıracaq. Bu barədə Rusiya Kənd Təsərrüfatı Nazirliyinin yaydığı məlumatda qeyd edilib.
 
Hazırda Rusiyadan buğda və meslin (buğda və çovdarın qarışığı) üçün ixrac rüsumu 3712,8 rubldur.
 
Kənd  təsərrüfatı üzrə ekspert Vahid Məhərrəmlinin sözlərinə görə, Rusiyada bu rüsumların qalxması Azərbaycanda buğdanın qiymətinə təsir göstərsə belə, bu, çox cüzi xarakter daşıyacaq.
 
"Azərbaycanda onsuzda taxılın qiyməti yüksəkdir. İndiki halda hökumət buğdanın tonunu 450 manatdan qəbul edir. Bu da o deməkdir ki, Rusiyadan gətirilən buğdanın qiyməti təxminən indiki ilə eyni olacaq. Azərbaycanda çörəyin qiymətində artım daha əvvəl baş verib. Zavod çörəyindən çox az sayda insanlar istifadə edir, əsasən coxlu çeşiddə çörək istehsal olunur və bu çörəklərin də qiyməti çox baha olur. Məncə Rusiyada bu rüsumların qalxması Azərbaycanda buğdanın qiymətinə təsir göstərsə belə, bu, çox cüzi xarakter daşıyacaq. Amma qiymətin qalxacağını dəqiq demək mümkün deyil. Hal-hazırda dünyada taxıl istehsalı yetərincədir. Qara dəniz ətrafında baş verən hadisələrlə bağlı olaraq Rusiya çalışır ki, gəlirlərini müəyyən qədər artırsın, digər sahələrdə isə bu mümkün deyil. Rusiya iqtisadiyyatı hal-hazırda çətin dövrünü yaşayır. Sənaye istehsalı və digər sahələrdə azalma var. Ona görə də bu yolla o problemləri konpensasiya etməyə çalışır. Rusiyanın dünya bazarında payı çox yüksəkdir, bu da ümumi dünya bazarındakı qiymətə nisbətən təsir edə bilər. Hansı ki, ötən ildə belə hadisə baş vermişdi. Rusiya rəhbərinin Türkiyə prezidenti ilə görüşü gözlənilir. Ola bilsin ki, bu görüşdən sonra, Qara dəniz ətrafında mövcud olan gərginlik aradan qaldırılacaq, yaxud da buğdanın ixracı üçün digər yollar axtarılacaq", - ekspert deyib.
 
İqtisadçı ekspert Xalid Kərimli isə bildirir ki, bu qərar Azərbaycanda daxili bazarda satılan buğda ununun qiymətinə birbaşa təsir göstərəcək.
 
"Rusiyada buğda ununa rüsümun artırılması Azərbaycanda daxili bazarda satılan buğda ununun qiymətinin qalxmasına birbaşa təsir göstərəcək, bu, birmənalıdır. Çünki, Azərbaycanda hal-hazırda ərazlıq buğdanın 75 faizi idxal olunur və onunda əhəmiyyətli hissəsi Rusiyadan gəlir. Bu da onu deməyə imkan verir ki, Rüsiyadan gələn unun qiyməti bahalaşacaq, amma çörəyin qiyməti isə indiki fazada bahalaşmayacaq”, - iqtisadçı ekspert bildirib.
 

www.anews.az