15 gündür dərsə gəlməyən şagirdin qızılcadan ölməsini məktəb təsdiqləmir

 

Məktəb nümayəndəsi bildirib ki, şagird məktəbə gəlməməklə bağlı hər hansı arayış təqdim etməyib və ona gəlmədiyi hər günə görə qayıb yazılıb. 

 

"Hazırda ölüm səbəbini bilmirik. Şagird qış tətilindən sonra məktəbə qayıtmayıb. Həmin vaxtı babası rəhmətə gedib, bununla bağlı rayona gediblər. Ondan sonra məktəbə qayıtmayıb. Məktəbə hər hansı arayış da təqdim etməyib və ona gəlmədiyi hər gün üçün qayıb yazılıb", - məktəbin nümayəndəsi bildirib. 

 

Məktəbin direktoru və ya müavini ilə məlumatları dəqiqləşdirə bilərikmi cavabında məktəb nümayəndəsi bildirdi ki, hazırda onlar iclasdadır, danışmaq mümkün olmayacaq. 

 

Təhsil eksperti Kamran Əsədov anews.az-a söyləyib ki, əgər şagird bir gün məktəbə gəlməsə belə məktəb ərazi üzrə polis nümayəndəliyinə məlumat verməlidir. 

 

"İbtidai sinifdə heç bir halda məktəbdən kənarlaşdırma yoxdur. Qayda belədir : orda müddət göstərilmir. Yazılıb ki, ardıcıl şəkildə altı ay gəlməsə avtomatik uzaqlaşdırılmalıdır. Qanunvericiliyə görə məktəbin öhdəliyi şagirdi icbari təhsilə cəlb etməkdir. Və əgər valideyn uzunmüddətli şagirdin məktəbə gəlməsini təmin etmirsə bununla bağlı məktəb ərazi polis nümayəndəsinə məlumat verməlidir ki, uşağın icbari təhsili təmin olunmur. Əgər səhhətində bir problem varsa bununla bağlı sənəd təqdim etməlidir. Məktəbin öhdəliyi şagird bir gün belə gəlməsə onun hüquq tərəflə səbəblərini araşıdrmaqdır. Dərsdə iştirak etmədiyinə görə qayıb yazan müəllimdir. Amma məktəb direktorunun öhdəliyi odur ki, niyə gəlmədiyini müəyyənləşdirsin. Onla bağlı müvafiq sənədləri uşaq məktəbə gələndə gətirməlidir. Amma məlumatı olmalıdır, qeyd dəftərində yazmalıdır ki, şərti olaraq şagird niyə məktəbə gəlməyib", - ekspert vurğulayıb. 

 

Bu gün bəzi yerli mətbuatda 51 saylı məktəbin 8-ci sinif şagirdinin qızılcadan ölməsi xəbərləri yayılıb. 

Daha sonra TƏBİB açıqlama yayaraq bildirib ki, məktəbliyə qızılcanın ensefalitlə ağırlaşaması, kəskin tənəffüs çatışmazlığı, ürək-damar çatışmazlığı, kəskin böyrək çatışmazlığı, hipovolemik şok diaqnozu təyin edilib və aparılan reanimasyon tədbirlər nəticə verməyib. 

 

Gülnar Nazimqızı