2 dəfə ürək əməliyyatı keçirən şəxs niyə pensiya ala bilmir? - Agentlikdən açıqlama

 

"22 il Neft şirkətində çalışmışam. 2014-ci ildə infarkt keçirdiyim üçün məni işdən azad ediblər. O vaxtdan bu günə qədər 2 dəfə ürək əməliyyatı, 4 dəfə infarkt keçirtmişəm. Səhhətimlə əlaqədar heç yerdə məni işə götürmürlər. Vəzifəm sürücü olduğu üçün keçirdiyim ürək əməliyyatı ilə bağlı maşın sürməyim riskli hesab olunduğu üçün iş tapa bilmirəm. Bununla yanaşı yüksək şəkər xəstəsiyəm. Şəkər dərmanlarımı dövlət təmin edir. Amma digər dərmanlarımı ala bilmirəm", - şikayətçi bildirib. 

 

Ramiz Ağamalıyev söyləyir ki, 2022-ci ilə qədər ona əlilik təyin olunsa da, o vaxtdan sonra ona verilən pensiya ləğv edilib. Səbəb kimi isə səhhətinin yaxşı olması göstərilib. 

 

"Hazırda səhhətimlə bağlı dərmanlarımı dost tanış alır. Hardasa 390 manat vəsait edir. Tənha yaşayan adamam. Qaradağ rayon icra hakimiyyətində tənha yaşayan adamlar siyahısında olsam da heç bir dəstək göstərilmir. Sonuncu dəfə 2 həftə öncə  Dövlət Tbbi-Sosial Ekspertiza və Reabilitasiya Agentliyində oldum. Dedilər sən xəstə deyilsən, tam sağlam adamsan. Əgər sağlam adamamsa bu qədər dərmanı nə üçün içirəm?", - o bildirib. 

 

Məsələ ilə bağlı  Dövlət Tbbi-Sosial Ekspertiza və Reabilitasiya Agentliyindən anews.az-a bildirilib ki, hazırda Ramiz Ağamalıyevin səhhəti normal olduğu üçün ona əllillik təyin edilməsi mümkün deyil. 

 

"Bakı şəhər sakini Ağamalıyev Ramiz Şirvan oğlu əlilliyinin qiymətləndirilməsi ilə bağlı tibb müəssisəsi tərəfindən rəsmiləşdirilən göndəriş (forma-88) əsasında 15.07.2024-cü il tarixdə Dövlət Tbbi-Sosial Ekspertiza və Reabilitasiya Agentliyində əyani müayinə edilib.  Müayinə zamanı vətəndaşın hazırki sağlamlıq vəziyyətinin əlillik təyinatına əsas vermədiyi müəyyən edilib.Bu səbəbdən də Nazirlər Kabinetinin 13 may 2022-ci il tarixli 187 nömrəli qərarı ilə təsdiq edilmiş "Əlilliyin müəyyən olunması meyarları”na uyğun olaraq Diaqnoz əlillik əlaməti təyin etmir barədə qərar qəbul edilib", - açıqlamada deyilir. 

 

Gülnar Nazimqızı