"Asan İmza" niyə işləmir? - Rəsmi açıqlama

"Asan İmza" ilə bağlı yaranan problem İqtisadiyyat Nazirliyi yanında Dövlət Vergi Xidməti ilə bağlı deyil. Bu barədə anews.az-ın sorğusuna cavab olaraq qurumdan bildirilib. 

"İki gündür "Asan İmza"ya girişlə bağlı müəyyən problemlər var. Problemlər Dövlət Vergi Xidməti ilə bağlı deyil. Aiddiyatı qurumlar problemlemin aradan qaldırılması istiqamətində işlər aparır", - sorğuya cavabda qeyd olunub. 

"Azercell"dən anews.az-a cavab olaraq bildirilib ki, "Asan İmza" ilə bağlı problemlər hazırda davam edir. Problemin ən qısa zamanda həll olunması üçün işlər gedir. 

Qurum rəsmisi problemin həll olunacağı təqdirdə müştərilərə bununla bağlı bildiriş göndəriləcəyini vurğulayıb. 

Azərbaycan İnternet Forumunun rəhbəri Osman Gündüz öz sosial hesabında paylaşım edərək "Asan İmza" sisteminin çökməsini uğursuzluq adlandırıb. Bildirib ki, "Asan İmza" kritik infrastruktura aid edilməlidir.

E-qaimə, bütün növ vergi bəyannamələri, məcburi dövlət sosial sığorta, işsizlikdən sığorta və icbari tibbi sığorta haqları bəyannaməsi, əmək haqları ilə bağlı və s. xidmətləri əldə etmək yalnız "Asan imza" ilə mümkündür.

Gülnar Nazimqızı