Qanunsuz taksi fəaliyyəti ilə məşğul olan sürücülərlə davamlı iş aparılır - Rövşən Tağıyev

Qanunsuz fəaliyyət göstərən "manatlıq taksi" xidməti ilə məşğul olan sürücülərlə yol polisi davamlı iş aparır.  Bunu Daxili İşlər Nazirliyinin Baş Dövlət Yol Polisi İdarəsinin Hərəkətin təhlükəsizliyinin təbliği və ictimai qurumlarla əlaqə şöbəsinin rəisi Rövşən Tağıyev bildirib. 

“Bu sürücülər əksər hallarda lisenziyasız fəaliyyət göstərir, vergi öhdəliklərini yerinə yetirmir və yol hərəkəti qaydalarını pozmaqla ictimai nəqliyyat sisteminə mənfi təsir göstərirlər”, - Rövşən Tağıyev mayın 2-də Bakıda Medianın İnkişafı Agentliyinin təşkilatçılığı ilə “İctimai proseslər media müstəvisində” mövzusunda keçirilən ikinci forum çərçivəsində “Nəqliyyat infrastrukturunda davamlı həllər media müstəvisində” adlı paneldə deyib.

O əlavə edib ki, dövlət nəzarətindən kənarda fəaliyyət göstərdikləri üçün onların hüquqi məsuliyyətə cəlb olunmaları çətinləşir. 

“Məsələ ondadır ki, yol polisi fiziki olaraq şəhərin hər bir nöqtəsində 24 saat nəzarət edə bilməz. Sürücülər vəziyyətdən sui-istifadə edərək, yoxlamalar olmayan zamanlarda qanunsuz fəaliyyətlərini davam etdirirlər. Yol polisi əraziyə gəldikdə isə həmin sürücülər dərhal uzaqlaşır və müəyyən müddət sonra geri qayıdırlar” - o əlavə edib.

Ölkədə taksi fəaliyyətinə nəzarət edən qurum Azərbaycan Yerüstü Nəqliyyat Agentliyidir. 

Aytac Zeynalova