Badamdar otelinin keçmiş xəzinədarı 8 il həbs cəzası alıb

Badamdar Hotel & Residences-in keçmiş baş xəzinədarı Dünyamalı Qarayev 163 min manatdan çox vəsaiti mənimsədiyinə görə, Bakı Ağır Cinayətlər Məhkəməsi tərəfindən 8 il müddətinə azadlıqdan məhrum edilib.

30 yaşlı Bakı sakini Qarayev Cinayət Məcəlləsinin 179.3.2 (külli miqdarda mənimsəmə), 308.1 (vəzifə səlahiyyətlərindən sui-istifadə) və 313 (vəzifə saxtakarlığı) maddələri ilə təqsirli bilinib.

İstintaqın məlumatına görə, Qarayev Badamdar Estates MMC-də çalışarkən şirkətin FO, F10, Chillbar, CIB, SPA və digər bölmələrindən daxil olan vəsaitləri qəsdən az göstərərək, maliyyə sənədlərinə yalan məlumatlar daxil edib.

Bəzi hallarda vergül sonrası rəqəmlərin yerini dəyişərək 1 750 manat əvəzinə 175,00 manat kimi qeyd edib.

Audit nəticəsində məlum olub ki, Qarayev mənimsənilmiş vəsaitləri şəxsi məqsədlər – o cümlədən bir restoranda çalışan ofisiant xanıma hədiyyələr, dəbdəbəli həyat tərzi və mərc oyunlarına xərcləyib. Onun aylıq maaşı cəmi 800 manat olub.

İstintaq zamanı günahını etiraf etsə də, məhkəmədə ifadəsini dəyişərək ittihamı qəbul etməyib və auditin şəffaf aparılmadığını iddia edib.

Badamdar Estates iş üzrə zərərçəkmiş kimi tanınıb. Audit günü işə gəlməyən və zənglərə cavab verməyən Qarayev daha sonra saxlanılıb və həbs olunub.

N.Təbrizli