“Biletim.az” portalı üzərindən onlayn bilet satışı iki dəfə artıb

2025-ci ilin ilk altı ayı ərzində “biletim.az” portalı vasitəsilə 337 321 bilet onlayn qaydada satılıb. Bu göstərici ötən ilin eyni dövrü ilə müqayisədə təxminən iki dəfə artım deməkdir. Bu barədə məlumatı Azərbaycan Yerüstü Nəqliyyat Agentliyi yayıb.

Rəsmi statistikaya əsasən, qabaqcadan satılmış biletlərin xüsusi çəkisi ötən ilin eyni dövründə 17% təşkil edirdisə, bu il bu göstərici 32,1%-ə yüksəlib.

Agentlik bildirir ki, bu artım sərnişinlərin avtovağzal xidmətlərinə inamının artdığını göstərir.

Hazırda portal üzərindən 51 şəhər və rayona, 82 istiqamət üzrə bilet almaq mümkündür.

Sistemə 373 nəqliyyat vasitəsi ilə 326 reys qoşulub. Agentlik bildirib ki, onlayn bilet satışı sistemi mərhələli şəkildə bütün daşıyıcı və avtovağzalları əhatə edəcək.

Sərnişinlərə rahat və təhlükəsiz səyahət üçün bilet əldə etməyi “biletim.az” portalı vasitəsilə onlayn şəkildə həyata keçirmək tövsiyə olunur.