BP: AÇG yataqları üzrə ilin ilk yarısında xərclər 817 milyon dollar təşkil edib

Bu ilin yanvar–iyun aylarında Xəzərin Azərbaycan sektorunda yerləşən “Azəri-Çıraq-Günəşli” (AÇG) yataqları üzrə ümumilikdə 817 milyon ABŞ dolları həcmində xərclər çəkilib. Bu barədə “BP-Azerbaijan” şirkəti operator qismində məlumat yayıb.

Altı ayda AÇG üzrə təqribən 259 milyon dollar əməliyyat və 558 milyon dollar əsaslı xərclərə yönəldilib. Əməliyyat xərcləri ötən ilin eyni dövrü ilə müqayisədə 6,6% (16 milyon dollar) artıb, əsaslı xərclər isə 20% (140 milyon dollar) azalıb.

AÇG Azərbaycanın ən iri neft yatağı blokudur. Yataqların işlənməsi üzrə ilk hasilat bölgüsü sazişi 1994-cü ilin sentyabrında, yeni saziş isə 2017-ci ilin sentyabrında imzalanıb. Yeni sazişə əsasən, AÇG-nin istismarı 2049-cu ilin sonunadək davam edəcək.

Hazırda AÇG layihəsində pay bölgüsü aşağıdakı kimidir: SOCAR – 31,65%, BP – 30,37%, MOL – 9,57%, INPEX – 9,31%, ExxonMobil – 6,79%, TPAO – 5,73%, ITOCHU – 3,65% və ONGC Videsh Limited (OVL) – 2,92%.

Aytac