Novosibirsk vitse-spikeri Mais Məmmədov dövlət mükafatına layiq görülüb

Novosibirsk vilayətinin Qanunvericilik Məclisinin sədr müavini və “Birinci Tikinti Fondu”nun baş direktoru Mais Məmmədov “Vətən qarşısında xidmətlərə görə” Rusiya Ordeninin II dərəcəli medalı ilə təltif olunub.

Mükafat cümə günü Rusiya Federasiyasının Dövlət Bayrağı Gününə həsr olunmuş mərasimdə təqdim edilib. Novosibirsk vilayətinin qubernatoru Andrey Travnikov və Qanunvericilik Məclisinin sədri Andrey Şimkiv region hökumətinin böyük zalında 75 sakinə dövlət, prezident və regional mükafatlar təqdim ediblər.

“Mənim üçün böyük şərəfdir ki, prezident bu mükafatı böyük Rusiyanın xalqı adından təqdim edir. Mən bunu təkcə özüm üçün deyil, həm də komandam üçün mükafat sayıram. Əlbəttə, çox həyəcanlıyam. Bu, mənim bütün yetkin həyatım boyu yanımda olan hər kəsin əməyidir,” –  Məmmədov bildirib.

“39 il əvvəl buraya, Sibirin qoynuna gələndə sevdim və qaldım, heç vaxt düşünməzdim ki, xidmətlərim dövlət və Rusiya prezidenti tərəfindən bu qədər yüksək qiymətləndiriləcək.”

Şimkiv mükafatlandırılanları təbrik edərək Məmmədovun təltifini xüsusi vurğulayıb. “Mənim müavinim Mais Məmmədov və həmkarlarımın bu gün mükafatçılar arasında olmasından ikiqat qürur duyuram. Sizlərlə təkcə Novosibirsk vilayəti deyil, bütün ölkə fəxr edir,” –  o bildirib.

Regional parlamentin birinci sədr müavini Andrey Panferov isə Məmmədovu “söz və əməl adamı, geniş qanunvericilik təcrübəsinə malik şəxs” kimi xarakterizə edib. Məmmədov Novosibirsk vilayətinin Qanunvericilik Məclisinə deputat seçilən və onun vitse-spikeri olan ilk azərbaycanlıdır.
Azərbaycan doğumlu Məmmədov 1986-cı ildə, 21 yaşında Novosibirskiyə köçüb və daha sonra tikinti obyektlərinin tam dövrünü əhatə edən səkkiz şirkətdən ibarət “Birinci Tikinti Fondu”nun rəhbəri olub. Fond vilayətin tikinti bazarının aparıcı iştirakçılarından biri hesab olunur.

Məmmədov ictimai həyatda da fəal iştirak edir. O, Novosibirsk Memarlıq və İnşaat Universitetinin Himayəçilər Şurasının üzvüdür, Regional İş Adamları Tikinti Klubuna rəhbərlik edir.

2013-cü ildə iki xalq arasında əlaqələrin gücləndirilməsi və gənclərin iştirakı üçün şərait yaratmaq məqsədilə yaradılmış “Rusiya-Azərbaycan Evi” regional ictimai təşkilatının təsisçilərindən biri olub.