Fermerlərə üzüm sahələrinə görə 168 min manatdan çox sığorta ödənişi edilib

Azərbaycanda dövlət dəstəyi ilə tətbiq edilən aqrar sığorta mexanizmi çərçivəsində üzüm sahələrinə dəyən zərərlərlə bağlı 168 min 182 manat məbləğində sığorta ödənişi həyata keçirilib. Bu barədə Aqrar Sığorta Fondu məlumat yayıb.

Ən böyük ödəniş 154 min 420 manat olmaqla Şamaxı rayonunda qeydə alınıb. Digər ödənişlər İsmayıllı, Beyləqan, Tovuz və Qax rayonlarındakı fermerlərə edilib.

Hazırda aqrar sığorta çərçivəsində 41 bitki növü üzrə məhsul və əkin sahələrinin sığortalanması mümkündür. Üzüm bağları leytan yağışı, dolu, sel, subasma, qasırğa və vəhşi heyvanların hücumu daxil olmaqla müxtəlif risklərdən qorunur.

Aqrar Sığorta Fonduna görə, üzüm məhsulu leytan riskinə qarşı təminat verilən üç məhsuldan biridir – digər ikisi pambıq və gilastır. Dolu nəticəsində yaranan keyfiyyət itkisi bu sahədə ən çox rast gəlinən zərər səbəbidir.

Sığorta haqları regionlara görə dəyişir. Məsələn, Cəlilabad, Salyan və Neftçala rayonlarında fermerlər 1000 manatlıq üzüm məhsulunu cəmi 10 manata, Tovuz, Şəmkir və Qazaxda 32 manata, Şamaxı və İsmayıllıda isə 15,70 manata sığortalaya bilirlər.

Fondun məlumatına görə, üzüm məhsulu ilə yanaşı, üzüm tingləri və bar verən kollar da ayrıca sığorta oluna bilər.

Əlavə məlumat ASF-nin rəsmi internet səhifəsində, sosial media hesablarında və 1651 nömrəli çağrı mərkəzində təqdim olunur.

Gülnar