İcra başçısı ondan şikayət edən sakinləri məhkəməyə verib

Şabran rayon İcra Hakimiyyətinin başçısı Asif Hüseynov iki kənd sakini – Səbirə Vəliyeva və oğlu Vüsal Muradov haqqında rayon məhkəməsinə xüsusi ittiham qaydasında şikayət verib.

Müsavat.com-un məlumatına görə, şikayət Cinayət Məcəlləsinin 147.2-ci (ağır nəticələrə səbəb olan böhtan) və 148-ci (təhqir) maddələri üzrə qaldırılıb.

İttihamın səbəbi, Uzunboyad kənd sakinlərinin mətbuata müraciət edərək icra başçısının onlara olan borcu ödəmədiyini bildirməsi olub.

Vüsal Muradov mediaya açıqlamasında iddia edib ki, anası Səbirə Vəliyeva 2022-ci ildə 15 ton toxumluq arpanı (10 min 500 manatlıq) icra başçısına nisyə satıb, lakin ödəniş edilməyib. Onun sözlərinə görə, alış-veriş zamanı heç bir sənəd tərtib olunmayıb, çünki “rayonun başçısına inandıqları üçün” rəsmi müqavilə bağlamayıblar.

Ailə oktyabrın 20-də mətbuata müraciətdən sonra onlara icra başçısının görüşmək istədiyi barədə məlumat verildiyini, bir neçə gün sonra isə əksinə, başçının məhkəməyə xüsusi ittiham şikayəti təqdim etdiyini bildirib.

Şabran Rayon Məhkəməsi artıq iş üzrə hazırlıq iclasını keçirib və xüsusi ittiham qaydasında baxış iclasını noyabrın 19-na təyin edib.